LUNGSOD NG MAKATI, 12 Disyembre 2025 — Tinutulak ng Department of Education (DepEd) ang mas malinaw at strategic na budget push para sa 2026 upang palakasin ang Inclusive Education programs at mas mapalawak ang access sa pag-aaral sa buong bansa. Alinsunod sa direksyon ng Bagong Pilipinas ni President Ferdinand R. Marcos Jr., pinapamunuan ni Education Secretary Sonny Angara ang mga hakbang na nagbibigay ng mas patas at makabuluhang oportunidad para sa learners with disabilities, indigenous communities, out-of-school youth, at iba pang sektor na matagal nang nahaharap sa balakid sa edukasyon.

Malaking bahagi ng panukalang FY 2026 budget, na kasalukuyang tinitingnan para sa bicameral conference, ang nakalaan para patibayin ang mga programang sumusuporta sa milyun-milyong mag-aaral mula sa iba’t ibang marginalized groups.

“Kasama sa pinakamahalagang prayoridad natin at ni President Bongbong Marcos ang pagtitiyak na mas magiging inklusibo ang ating edukasyon para mabigyan sila ng patas at mas malawak na pagkakataong abutin ang kanilang mga pangarap,” ani Secretary Angara.

Tatanggap ng PhP1.04 bilyon ang Special Needs Education (SNED) program na nagbibigay ng mahalagang suporta sa learners with special needs, batay sa panukalang budget na inaprubahan ng Senado.

Naglaan din ang DepEd ng PhP897 milyon para sa Alternative Learning System (ALS) sa 2026 upang matulungan ang higit 639,782 ALS learners na maipagpatuloy ang kanilang pag-aaral. Kasama rito ang capacity-building para sa 500 ALS implementers na nakatuon sa micro-certification para mapaunlad ang kanilang kakayahan sa pagtuturo.

May PhP522 milyon ding inihain para palakasin ang Madrasah Education Program para sa Muslim learners, na makikinabang ang humigit-kumulang 149,031 ALIVE learners mula sa 4,046 na paaralan. Aabot naman sa PhP154 milyon ang suporta para sa Indigenous Peoples Education (IPEd) program, na magbibigay-serbisyo sa tinatayang 482,329 IPEd learners.

Mula nang ilunsad ni Secretary Angara ang Five-Point Reform Agenda isang taon na ang nakalipas, tuloy-tuloy ang pag-usad ng DepEd sa inclusivity reforms, kabilang ang pagtatayo ng Inclusive Learning Resource Center (ILRC) facilities na may mga e-library, instructional materials, at iba pang kagamitan para sa iba’t ibang uri ng mag-aaral.

Pinagtibay rin ni Angara ang tutok ng DepEd sa ALS bilang paraan para matulungan ang learners na naghahanap ng pangalawang pagkakataon sa edukasyon. Sa pakikipagtulungan sa UNICEF, nakapagtapos ang humigit-kumulang 400 ALS learners sa Micro-Certification Program na nagbukas ng mas maayos na landas sa trabaho at kabuhayan.

Nakipag-ugnayan din ang DepEd sa Special Olympics Pilipinas para suportahan ang inclusion ng individuals with intellectual disabilities sa pamamagitan ng transformative sports programs.

Sa mga susunod na buwan, paiigtingin ng DepEd ang mga hakbang para mas maisulong at ma-institutionalize ang inclusive education sa buong sistema.

Ginagamit din ng Education Center for AI Research (ECAIR) ng DepEd ang Screening using AI-Based Assistance for Young Children (SABAY) project, isang AI-powered digital tool na tutulong tukuyin ang mga batang maaaring may risk sa developmental delays o disabilities.

Muling tiniyak ni Angara na nananatiling matatag ang DepEd sa layuning mabigyan ang bawat mag-aaral—anumang kalagayan, identidad, o sitwasyon—ng dekalidad at nagbibigay-lakas na edukasyon.